🌿 स्वच्छ जळगावसाठी महापालिकेचा अॅक्शन प्लॅन; डम्पिंग ग्राउंड प्रकल्पाचा उपमहापौर व स्थायी समिती सभापतींकडून आढावा

जळगाव डम्पिंग ग्राउंड प्रकल्पाला वेग; धुराच्या समस्येवर उपमहापौरांचा मोठा निर्णय, 24 तास फायर ब्रिगेड तैनात!

जळगांव जिल्हा प्रतिनिधी, निलेश खैरनार.

जळगाव शहरातील डम्पिंग ग्राउंड येथे सुरू असलेल्या घनकचरा प्रक्रिया प्रकल्पाच्या कामाची उपमहापौर मनोज चौधरी आणि स्थायी समिती सभापती डॉ. चंद्रशेखर पाटील यांनी आज पाहणी करून सविस्तर आढावा घेतला. नागरिकांच्या आरोग्याचा प्रश्न ऐरणीवर आल्याने या पाहणीला विशेष महत्त्व प्राप्त झाले आहे.

डम्पिंग ग्राउंड परिसरात वारंवार लागणाऱ्या आगीमुळे परिसरात मोठ्या प्रमाणात धूर पसरत असून नागरिकांच्या आरोग्याला धोका निर्माण झाला आहे. या गंभीर समस्येची दखल घेत उपमहापौर चौधरी यांनी तातडीने 24 तास अग्निशमन दलाचा बंब तैनात ठेवण्याचे निर्देश दिले आहेत.

पाहणीतील ठळक मुद्दे:

रॅम्पचे काम जवळपास 80 टक्के पूर्ण झाले असून प्रोसेसिंग प्लांटचे काम 30 टक्के पूर्ण झाल्याची माहिती ठेकेदाराने यावेळी दिली. उर्वरित काम विहित मुदतीत आणि गुणवत्तापूर्ण पद्धतीने पूर्ण व्हावे यासाठी ठेकेदाराकडून लेखी हमीपत्र घेण्याच्या सूचना देण्यात आल्या. कोणत्याही परिस्थितीत कामाला विलंब खपवून घेतला जाणार नाही, असा स्पष्ट इशारा ठेकेदाराला देण्यात आला.

यावेळी अतिरिक्त आयुक्त शोभा बाविस्कर, आरोग्य उपायुक्त निर्मला गायकवाड, आरोग्य विभाग प्रमुख समीर बोरोले, प्रकल्प प्रमुख अभियंता योगेश वाणी यांच्यासह ठेकेदार कंपनीचे प्रतिनिधी उपस्थित होते.

नागरिकांचे आरोग्य आणि स्वच्छ जळगाव हीच महानगरपालिकेची प्राथमिकता असल्याचे यावेळी उपमहापौरांनी सांगितले.