🚨 जळगाव पोलिसांचा मोठा दणका! तब्बल ११.१७ लाखांचा अमली पदार्थ जप्त; ‘एफेड्रीन’सह गांजा हस्तगत स्थानिक गुन्हे शाखा व एमआयडीसी पोलिसांची संयुक्त कारवाई; ५५ वर्षीय संशयित ताब्यात

जळगांव प्रतिनिधी, सागर पाटील.

जळगाव : अमली पदार्थांच्या तस्करीविरोधात जळगाव पोलिसांनी मोठी कारवाई करत तब्बल ११ लाख १७ हजार २०० रुपयांचा मुद्देमाल जप्त केला आहे. स्थानिक गुन्हे शाखा (LCB) आणि एमआयडीसी पोलिसांनी संयुक्तपणे केलेल्या या कारवाईत एफेड्रीन (Ephedrine) या अमली पदार्थासह गांजा आणि एक दुचाकी जप्त करण्यात आली आहे.

पोलिसांनी दिलेल्या माहितीनुसार, ३१ ऑगस्ट २०२६ रोजी रात्री सुमारे ११.४० वाजता एमआयडीसी परिसरातील नागरिकांकडून मिळालेल्या गोपनीय माहितीनुसार संशयित व्यक्ती अमली पदार्थ घेऊन येणार असल्याची माहिती पोलिसांना मिळाली होती. त्यानुसार पोलिसांनी सापळा रचून संशयिताला ताब्यात घेतले.

या कारवाईत नर मोहम्मद अमुल्ला सलाम पटेल (वय ५५, रा. रामनगर, मेहरूण, जळगाव) याच्याकडून अमली पदार्थ जप्त करण्यात आल्याचे पोलिसांनी सांगितले.

💥 काय-काय जप्त केले?
जप्त मुद्देमाल प्रमाण

एफेड्रीन (Ephedrine) १ किलो ९६३ ग्रॅम – ₹९,८१,५००
गांजा २ किलो ११४ ग्रॅम – ₹१,०५,७००
बर्गमन दुचाकी (MH-19-EK-4305) – ₹३०,०००

एकूण मुद्देमाल – ४ किलो ०७७ ग्रॅम

अंदाजे एकुण किंमत – ₹११,१७,२००

प्राथमिक तपासणीत जप्त केलेल्या रासायनिक पदार्थाची ‘एफेड्रीन’ अशी ओळख पटल्याचे पोलिसांनी नमूद केले आहे. या प्रकरणी NDPS Act, 1985 अंतर्गत कलम 9(अ), 25(अ), 8(क) सह 20(b)(ii) प्रमाणे गुन्हा दाखल करण्यात आला आहे.

ही कारवाई पोलीस अधीक्षक प्रवीण मुंढे यांच्या मार्गदर्शनाखाली अपर पोलीस अधीक्षक संदिप गावीत, उपविभागीय पोलीस अधिकारी नितीन गणापूरे तसेच स्थानिक गुन्हे शाखा व एमआयडीसी पोलिसांच्या पथकाने केली.

अमली पदार्थांच्या तस्करीला आळा घालण्यासाठी जळगाव पोलिसांनी उचललेले हे आणखी एक महत्त्वाचे पाऊल मानले जात असून, या प्रकरणाचा पुढील तपास सुरू आहे.