🚨 जळगाव शहर पोलिसांची धडाकेबाज कारवाई!

जळगांव प्रतिनिधी, सागर पाटील.

चोरीचा गुन्हा अवघ्या ५ तासांत उघडकीस; तिघे ताब्यात, ₹१२ हजारांची रोकड हस्तगत

जळगाव : जळगाव शहर पोलीस ठाण्याच्या हद्दीत घडलेल्या चोरीच्या गुन्ह्याचा अवघ्या पाच तासांत छडा लावत गुन्हे शोध पथकाने तिघांना ताब्यात घेतले आहे. संशयितांकडून चोरीस गेलेली ₹१२ हजारांची रोख रक्कम हस्तगत करण्यात आली आहे.

पोलिसांनी दिलेल्या माहितीनुसार, २८ ऑगस्ट २०२६ रोजी दुपारी ३ ते ४.३० वाजेच्या दरम्यान जळगाव शहरातील शाहूनगर परिसरातील शाहू कॉम्प्लेक्स येथे फिर्यादी अनिल राजमल कासट यांच्या पेंटच्या खिशातील ₹१२,५०० रुपये अज्ञात चोरट्यांनी लंपास केले होते. याप्रकरणी जळगाव शहर पोलीस ठाण्यात सीसीटीएनएस गुन्हा क्र. ३३३/२०२६, भारतीय न्याय संहिता कलम ३०३(२) अन्वये गुन्हा दाखल करण्यात आला.

गुन्ह्याचे गांभीर्य लक्षात घेऊन पोलीस अधीक्षक श्रीकांत धिवरे यांनी जळगाव शहर पोलीस ठाण्याचे प्रभारी पोलीस निरीक्षक सागर शिंपी यांना तातडीने तपासाच्या सूचना दिल्या. त्यानुसार गुन्हे शोध पथकाने परिसरातील सीसीटीव्ही फुटेजचे तांत्रिक विश्लेषण करून संशयितांचा माग काढला.

तपासादरम्यान मिळालेल्या माहितीच्या आधारे पोलिसांनी शहीदखान नजीरखान (वय २७, रा. युसूफ मेडिकलगजवळ, गोंदालाल मिल, जळगाव), समीर खान मजीदखान (वय ३७, रा. बिल्डिंग नं. ११, घर नं. १५, गोंदालाल मिल, जळगाव) तसेच एका विधी संघर्षित बालकाचा सहभाग असल्याची माहिती मिळवली.

पथकाने तात्काळ कारवाई करत संशयितांना ताब्यात घेतले. चौकशीत त्यांनी चोरीच्या गुन्ह्याची कबुली दिल्याचे पोलिसांनी सांगितले. त्यांच्याकडून ₹१२,००० रोख रक्कम हस्तगत करण्यात आली असून, चोरीचा गुन्हा अवघ्या पाच तासांत उघडकीस आणण्यात जळगाव शहर पोलिसांना यश आले.

ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गवित, उपविभागीय पोलीस अधिकारी नितीन गणापुरे यांच्या मार्गदर्शनाखाली वरिष्ठ पोलीस निरीक्षक सागर शिंपी यांच्या नेतृत्वाखालील गुन्हे शोध पथकाने केली.

पोलिसांच्या तत्पर तपासामुळे चोरीचा गुन्हा काही तासांतच उघडकीस आल्याने जळगाव शहर पोलिसांच्या कार्यक्षमतेचे कौतुक होत आहे.