🔥 गॅसला पर्याय शोधताना विद्यार्थ्यांची भन्नाट कल्पना; कचऱ्यातून तयार केले बायो ब्रिकेटस्

जळगांव प्रतिनिधी, महेश माळी.

इंधन बचत, पर्यावरण संवर्धन आणि कचरा व्यवस्थापनाचा संदेश कृतीतून देत श्री संत ज्ञानेश्वर प्राथमिक व माध्यमिक विद्यालय, मेहरुण येथे इको क्लबच्या वतीने बायो ब्रिकेट्स निर्मितीचा अभिनव उपक्रम राबविण्यात आला. जैविक कचऱ्याचा योग्य वापर करून पर्यायी इंधन तयार करता येते, हे विद्यार्थ्यांना प्रत्यक्ष प्रात्यक्षिकातून दाखविण्यात आले.

विद्यालयाचे मुख्याध्यापक श्री. मुकेश सुरेश नाईक यांच्या मार्गदर्शनाखाली हा उपक्रम घेण्यात आला. इको क्लबच्या प्रमुख रूपाली आव्हाड मॅडम यांनी विद्यार्थ्यांना बायो ब्रिकेट्स निर्मितीचे प्रत्यक्ष प्रात्यक्षिक करून दाखविले. सुकी पाने, शेतीतील अवशेष, भुसा यांसारख्या जैविक पदार्थांचा वापर करून त्यापासून बायो ब्रिकेट्स तयार करण्याची प्रक्रिया विद्यार्थ्यांनी समजून घेतली.

या उपक्रमातून विद्यार्थ्यांना जैविक कचऱ्याचा पुनर्वापर, ऊर्जा बचत, पर्यावरण संवर्धन आणि पर्यायी ऊर्जास्रोतांचे महत्त्व समजले. घरगुती व शेतीतील जैविक कचऱ्याचे योग्य व्यवस्थापन करून त्याचा उपयोग पर्यायी इंधन निर्मितीसाठी करता येऊ शकतो, हा संदेश या उपक्रमातून देण्यात आला.

विद्यार्थ्यांमध्ये वैज्ञानिक दृष्टिकोन, प्रयोगशीलता, नवोपक्रमशीलता आणि पर्यावरणाप्रती जबाबदारीची भावना निर्माण करण्यासाठी इको क्लबच्या माध्यमातून अशा कृतीशील उपक्रमांचे आयोजन करण्यात येत असल्याचे मुख्याध्यापक मुकेश नाईक यांनी सांगितले.

या अभिनव उपक्रमामुळे विद्यार्थ्यांना ‘कचरा म्हणजे समस्या नव्हे, तर योग्य वापर केल्यास तो ऊर्जेचा स्रोत ठरू शकतो’ याचा प्रत्यक्ष अनुभव मिळाला.