🔱🕉️ श्रावणात विद्यार्थ्यांची अनोखी शिवभक्ती; मानवी त्रिशूळासोबत साकारले ‘ॐ’!

विद्यार्थ्यांच्या सर्जनशीलतेतून शिवतत्त्वाला अनोखी मानवंदना

जळगांव प्रतिनिधी, महेश माळी.

मेहरुण : श्रावण महिन्याचे औचित्य साधून श्री संत ज्ञानेश्वर प्राथमिक व माध्यमिक विद्यालय, मेहरुण येथे विद्यार्थ्यांनी अनोख्या पद्धतीने शिवभक्तीचा संदेश दिला. इयत्ता तिसरी व चौथीच्या विद्यार्थ्यांनी एकत्र येत आपल्या शरीरातून मानवी त्रिशूळ आणि ‘ॐ’ चिन्ह साकारत सर्वांचे लक्ष वेधून घेतले.

श्रावण महिन्यात भगवान शिवाच्या उपासनेला विशेष महत्त्व आहे. याच पार्श्वभूमीवर विद्यार्थ्यांच्या कल्पकतेला व संघभावनेला चालना देण्यासाठी हा अभिनव उपक्रम घेण्यात आला. विद्यार्थ्यांनी अत्यंत शिस्तबद्ध पद्धतीने रचना करत त्रिशूळ आणि ॐ ही भारतीय संस्कृतीतील महत्त्वपूर्ण प्रतीके मानवी स्वरूपात साकारली.

विशेष म्हणजे, शाळेच्या प्रांगणातून उंचीवरून टिपलेल्या छायाचित्रांमध्ये विद्यार्थ्यांनी साकारलेली ही दोन्ही प्रतीके अत्यंत आकर्षक दिसत असून, ‘एकता आणि संघभावनेतून साकारलेली शिवभक्ती’ असा संदेश यातून देण्यात आला. धार्मिक संस्कृतीसोबत विद्यार्थ्यांमध्ये शिस्त, परस्पर सहकार्य, नियोजन, एकजूट आणि सर्जनशीलता विकसित करण्याचा प्रयत्न या उपक्रमातून करण्यात आला.

या उपक्रमाचे नियोजन व विद्यार्थ्यांना मार्गदर्शन इयत्ता तिसरी व चौथीच्या शिक्षिका स्वाती नाईक, कल्याणी महाजन व सोनाली चौधरी यांनी केले. पर्यवेक्षिका शितल कोळी यांच्या सहकार्याने उपक्रम यशस्वीपणे पार पडला. शाळेचे मुख्याध्यापक मुकेश नाईक यांच्या मार्गदर्शनाखाली विद्यार्थ्यांनी या उपक्रमात उत्स्फूर्त सहभाग घेतला.

विद्यार्थ्यांनी साकारलेला मानवी त्रिशूळ आणि ॐ हा उपक्रम केवळ धार्मिक प्रतीकांचे सादरीकरण न राहता भारतीय संस्कृती, विद्यार्थ्यांची सर्जनशीलता आणि एकजुटीचे प्रभावी दर्शन घडविणारा ठरला. या अभिनव उपक्रमाचे पालक, शिक्षक व परिसरातून कौतुक होत आहे.

‘एकत्र आलो, संस्कृती जपली आणि सर्जनशीलतेतून शिवभक्ती साकारली!’ असा संदेश देणारा हा उपक्रम श्रावणातील शालेय उपक्रमांमध्ये विशेष ठरला.