🇮🇳 ‘तिरंगा व वंदे मातरम्’ प्रदर्शनातून विद्यार्थ्यांमध्ये देशभक्तीचा जागर!

श्री संत ज्ञानेश्वर विद्यालय, मेहरुण येथे राष्ट्रप्रेम, संविधान व स्वातंत्र्यलढ्याचा जागर

जळगांव प्रतिनिधी, महेश माळी.

मेहरुण : श्री संत ज्ञानेश्वर प्राथमिक व माध्यमिक विद्यालय, मेहरुण येथे शासनाच्या निर्देशानुसार ‘तिरंगा व वंदे मातरम्’ या विषयावर माहितीपूर्ण व आकर्षक प्रदर्शनाचे आयोजन करण्यात आले. संस्थेचे अध्यक्ष मा. प्रशांत नाईक यांच्या हस्ते प्रदर्शनाचे उद्घाटन करण्यात आले.

या प्रदर्शनातून विद्यार्थ्यांसह पालक व नागरिकांना भारतीय राष्ट्रध्वजाचा गौरवशाली इतिहास, स्वातंत्र्य चळवळ, स्वातंत्र्यसैनिकांचे योगदान, ‘वंदे मातरम्’चे ऐतिहासिक महत्त्व तसेच भारतीय संविधान आणि राष्ट्रप्रेम याबाबत माहिती देण्यात आली.

प्रदर्शनात ‘भारताच्या राष्ट्रध्वजाचा प्रवास’, ‘स्वातंत्र्य चळवळ’, ‘स्वातंत्र्यसैनिकांचे योगदान’, ‘वंदे मातरम्’ आणि ‘संविधान व राष्ट्रप्रेम’ अशा विविध विषयांवर माहितीपूर्ण विभाग उभारण्यात आले होते. विद्यार्थ्यांनी प्रत्येक विभागाची जबाबदारी सांभाळत उपस्थितांना विषयाची माहिती प्रभावीपणे समजावून सांगितली.

ऐतिहासिक छायाचित्रे, चित्रफलक, माहितीफलक आणि देशभक्तीपर संदेशांमुळे प्रदर्शनाला विशेष आकर्षण प्राप्त झाले. या उपक्रमामुळे विद्यार्थ्यांमध्ये देशभक्ती, राष्ट्रीय एकात्मता, संविधानाविषयी आदर आणि राष्ट्रध्वजाबद्दल अभिमानाची भावना अधिक दृढ झाली.

पालक व नागरिकांनी प्रदर्शनाचे कौतुक करत विद्यार्थ्यांच्या अभ्यासपूर्ण सादरीकरणाचे अभिनंदन केले. यावेळी संस्थेचे अध्यक्ष प्रशांत नाईक, मुख्याध्यापक श्री. मुकेश सुरेश नाईक, शिक्षक-शिक्षकेतर कर्मचारी, विद्यार्थी, पालक व नागरिक मोठ्या संख्येने उपस्थित होते.

कार्यक्रमाच्या समारोपावेळी ‘वंदे मातरम्’ व राष्ट्रगीताचे सामूहिक गायन करण्यात आले. विद्यार्थ्यांनी राष्ट्रप्रेम आणि देशसेवेची प्रेरणा घेण्याचा संकल्प करत कार्यक्रमाची सांगता केली.