🚩 चिंचविहिरेत ज्ञानेश्वरी पारायणाची जय्यत तयारी; सप्ताहासाठी कोअर कमिटीची स्थापना!

ग्रामस्थांची एकजूट; भक्तिमय वातावरणात सप्ताह यशस्वी करण्याचा निर्धार

अहिल्यानगर जिल्हा प्रतिनिधी, शंकर कवाने.

चिंचविहिरे : श्री ज्ञानेश्वर माऊलींच्या कृपेने चिंचविहिरे गावात आयोजित करण्यात येणाऱ्या ज्ञानेश्वरी पारायण व सप्ताहाच्या नियोजनाला उत्साहात सुरुवात झाली आहे. या पार्श्वभूमीवर ग्रामस्थांची महत्त्वपूर्ण बैठक घेण्यात आली. बैठकीत सप्ताहाचे नियोजन, विविध जबाबदाऱ्या आणि आयोजनाबाबत चर्चा करून सप्ताहाची कोअर कमिटी स्थापन करण्यात आली.

या कोअर कमिटीमध्ये अध्यक्षपदी अनिल मुरकुटे, उपाध्यक्षपदी पोपट कदम, तर खजिनदारपदी शरद पानसंबळ यांची निवड करण्यात आली. तसेच राजेंद्र धांबोरे व कचरू नालकर यांच्यावर महत्त्वाची जबाबदारी सोपविण्यात आली असून, सेक्रेटरीपदी शंकर वाळके यांची नियुक्ती करण्यात आली.

ज्ञानेश्वरी पारायण व सप्ताह हा केवळ धार्मिक कार्यक्रम न राहता, गावातील ग्रामस्थांना एकत्र आणणारा आणि भक्ती, संस्कार व सामाजिक एकोपा वाढविणारा उपक्रम ठरावा, यासाठी सर्वांनी एकजुटीने काम करण्याचा निर्धार यावेळी व्यक्त करण्यात आला.

या पवित्र कार्यासाठी वेळ देऊन जबाबदारी स्वीकारणाऱ्या सर्व कोअर कमिटी सदस्यांचे ग्रामस्थांच्या वतीने मनःपूर्वक आभार व्यक्त करण्यात आले. तसेच सप्ताहाच्या यशस्वी आयोजनासाठी गावातील प्रत्येक ग्रामस्थाने सहकार्य करावे, असे आवाहन करण्यात आले.

ग्रामस्थांच्या एकजुटीने आणि माऊलींच्या आशीर्वादाने ज्ञानेश्वरी पारायण व सप्ताह भक्तिमय वातावरणात उत्साहात पार पडो, हीच श्री ज्ञानेश्वर माऊलींच्या चरणी प्रार्थना!

🚩 ज्ञानेश्वर माऊलींच्या नावाने चांगभलं! 🚩