🚨 “निकृष्ट बायपास कामावर मनसे-ठाकरे सेना आक्रमक; ठेकेदाराला ‘ब्लॅकलिस्ट’ करा, गुन्हे दाखल करा!”

जळगाव | प्रतिनिधी : निलेश खैरनार

तरसोद ते फागणे बायपास महामार्गावरील कथित निकृष्ट दर्जाच्या कामाविरोधात महाराष्ट्र नवनिर्माण सेना आणि उद्धव बाळासाहेब ठाकरे (शिवसेना) गटाने आक्रमक भूमिका घेत जिल्हाधिकाऱ्यांना सविस्तर निवेदन सादर केले. या प्रकरणाची उच्चस्तरीय तांत्रिक चौकशी करून संबंधित ठेकेदाराला काळ्या यादीत (ब्लॅकलिस्ट) टाकावे, तसेच दोषी अधिकारी व कंत्राटदारांवर फौजदारी आणि प्रशासकीय कारवाई करण्यात यावी, अशी जोरदार मागणी करण्यात आली.

निवेदनात म्हटले आहे की, तरसोद ते फागणे बायपास हा उत्तर महाराष्ट्रातील अत्यंत महत्त्वाचा राष्ट्रीय महामार्ग असून या मार्गावरून दररोज हजारो अवजड व प्रवासी वाहनांची वाहतूक होते. मात्र, या महामार्गाच्या बांधकामात दर्जाहीन साहित्याचा वापर झाल्याची आणि आवश्यक तांत्रिक निकषांचे पालन न झाल्याची गंभीर शंका असल्याचा आरोप करण्यात आला आहे.

या निकृष्ट कामामुळे शासनाच्या कोट्यवधी रुपयांच्या निधीचा अपव्यय झाला असून नागरिकांच्या जीवितालाही धोका निर्माण झाला आहे. त्यामुळे स्वतंत्र उच्चस्तरीय समितीमार्फत रस्त्याची प्रयोगशाळेत तपासणी करून दोषी आढळणाऱ्या कंत्राटदारावर भारतीय न्याय संहिता (BNS), भ्रष्टाचार प्रतिबंधक कायदा आणि इतर संबंधित कायद्यांनुसार गुन्हे दाखल करावेत, अशी मागणी करण्यात आली आहे.

यासोबतच संबंधित ठेकेदाराला भविष्यातील सर्व शासकीय निविदांमधून अपात्र घोषित करून ब्लॅकलिस्ट करण्यात यावे, तसेच कामाची देखरेख करणाऱ्या अभियंते व अधिकाऱ्यांचीही चौकशी करून त्यांच्यावर विभागीय व फौजदारी कारवाई करण्यात यावी, अशी मागणी निवेदनातून करण्यात आली.

दरम्यान, या मागण्यांकडे प्रशासनाने दुर्लक्ष केल्यास लोकशाही मार्गाने तीव्र आंदोलन छेडण्याचा तसेच सक्षम न्यायालय व वैधानिक प्राधिकरणांकडे दाद मागण्याचा इशाराही मनसे आणि ठाकरे गटाने दिला आहे.

यावेळी महाराष्ट्र नवनिर्माण सेनेचे ग्रामीण जिल्हाध्यक्ष मुकुंदा रोटे, महानगराध्यक्ष विनोद शिंदे, उपमहानगराध्यक्ष श्रीकृष्ण मेंगडे, ललित शर्मा, शेतकरी सेनेचे तालुकाध्यक्ष प्रदीप पाटील, उपतालुकाध्यक्ष शैलेश चौधरी, राहुल चव्हाण, सुनील सोनवणे, प्रशांत बाविस्कर, किरण सपकाळ, चेतन पाटील तसेच उद्धव बाळासाहेब ठाकरे (शिवसेना) गटाचे उपजिल्हाध्यक्ष भाऊसाहेब सोनवणे, तालुका प्रमुख प्रमोद घुगे, प्रमोद सोनवणे, गणेश पाटील, प्रेमराज राठोड, किरण ठाकूर, लोटन सोनवणे, राजेंद्र पाटील यांच्यासह मोठ्या संख्येने पदाधिकारी व कार्यकर्ते उपस्थित होते.