माहिती अधिकारातून मिळालेली कागदपत्रे व पुरावे सादर; दोषी अधिकारी-कर्मचाऱ्यांवर कठोर कारवाई करण्याची मागणी
नंदुरबार तालुका प्रतिनिधी, सागर ठाकरे.
नंदुरबार शहरातील काही शासकीय कार्यालयांमध्ये कथितरीत्या सुरू असलेल्या भ्रष्टाचाराच्या प्रकरणांची सखोल चौकशी करून संबंधितांवर कठोर कारवाई करण्यात यावी, या मागणीसाठी माहिती अधिकार कार्यकर्ता महासंघाचे नंदुरबार जिल्हा संपर्कप्रमुख राम ठक्कर यांनी विभागीय आयुक्त कार्यालय, नाशिक येथे भेट घेऊन निवेदन सादर केले.
या भेटीदरम्यान राम ठक्कर यांनी माहिती अधिकार कायद्यांतर्गत प्राप्त केलेली कागदपत्रे व संबंधित पुरावे विभागीय आयुक्तांसमोर सादर केले. नंदुरबारमधील संबंधित शासकीय कार्यालयांच्या कामकाजाची सखोल तपासणी करून वस्तुस्थिती समोर आणावी, अशी मागणी त्यांनी केली.
स्वतंत्र चौकशी समिती गठित करण्याची मागणी
संबंधित प्रकरणांची निष्पक्ष चौकशी होण्यासाठी स्वतंत्र चौकशी समिती गठित करण्यात यावी. सादर केलेल्या कागदपत्रांची पडताळणी करून जबाबदारी निश्चित करावी तसेच चौकशीत दोषी आढळणाऱ्या अधिकारी व कर्मचाऱ्यांवर नियमानुसार कठोर कारवाई करावी. गंभीर दोष सिद्ध झाल्यास बडतर्फीसारखी कारवाईही करण्यात यावी, अशी मागणी निवेदनातून करण्यात आली.
माहिती अधिकारातून उघड होणाऱ्या बाबींच्या चौकशीकडे लक्ष
शासकीय कार्यालयांतील कामकाजात पारदर्शकता असणे, नागरिकांच्या तक्रारींची दखल घेणे आणि शासकीय यंत्रणेवरील जनतेचा विश्वास कायम राखणे आवश्यक आहे. त्यामुळे सादर केलेल्या पुराव्यांची गांभीर्याने दखल घेऊन संबंधित प्रकरणांची सखोल चौकशी करण्यात यावी, अशी भूमिका राम ठक्कर यांनी मांडली.
या प्रकरणी विभागीय आयुक्तांकडून लवकरच कारवाई करण्याचे आश्वासन मिळाल्याचे राम ठक्कर यांनी सांगितले. आता संबंधित तक्रारींची प्रत्यक्ष चौकशी कधी सुरू होते, चौकशी समिती गठित केली जाते का आणि दोषींवर कोणती कारवाई होते, याकडे नंदुरबारमधील नागरिकांचे लक्ष लागले आहे.
भ्रष्टाचाराविरोधातील तक्रारींवर निष्पक्ष चौकशी होऊन सत्य समोर यावे आणि दोषींवर नियमानुसार कारवाई व्हावी, हीच या निवेदनामागील प्रमुख मागणी आहे.
नंदुरबार – राम ठक्कर (9175431411)