🚩 मेहरूण गणेश घाट विसर्जनासाठी सज्ज; स्वच्छता, आरोग्य आणि सुरक्षेला सर्वोच्च प्राधान्य!

जळगाव जिल्हा प्रतिनिधी, निलेश खैरनार.

जळगाव : गणेशोत्सवाच्या पार्श्वभूमीवर मेहरूण तलाव येथील गणेश घाटाची पाहणी करून गणेश विसर्जनाच्या पूर्वतयारीचा प्रत्यक्ष आढावा घेण्यात आला. भाविकांची गैरसोय होऊ नये यासाठी प्रशासनाकडून आवश्यक त्या सुविधा उपलब्ध करून देण्याच्या सूचना संबंधित अधिकाऱ्यांना देण्यात आल्या.

विसर्जनस्थळी आरोग्य कर्मचारी, वैद्यकीय पथक, मनुष्यबळ तसेच सुरक्षा व्यवस्थेची पुरेशी तयारी ठेवण्यावर भर देण्यात आला आहे. गणेश विसर्जनाचा सोहळा शांततेत, सुरक्षित आणि शिस्तबद्ध पद्धतीने पार पडावा यासाठी महापालिका प्रशासन सज्ज असल्याचे यावेळी सांगण्यात आले.

दरम्यान, तलावाचे प्रदूषण रोखण्यासाठी नागरिकांनी निर्माल्य प्लास्टिकच्या पिशव्यांमध्ये न आणता कागदात किंवा कागदी पिशवीत आणावे आणि ते निर्माल्य कलशातच टाकावे, असे आवाहन करण्यात आले.

पर्यावरणपूरक आणि स्वच्छ गणेश विसर्जनासाठी प्रशासनासोबत नागरिकांनीही सहकार्य करावे, असे आवाहन करण्यात आले आहे.