🚩🐂 काकर्देत मनसेच्या वतीने भव्य बैलपोळा उत्सव; बैलजोडी सजावट स्पर्धेला उत्स्फूर्त प्रतिसाद!

बळीराजाच्या कष्टाला सलाम; आकर्षक सजलेल्या बैलजोडींनी वेधले ग्रामस्थांचे लक्ष

नंदुरबार जिल्हा प्रतिनिधी, राम ठक्कर.

काकर्दे, ता. नंदुरबार : महाराष्ट्र नवनिर्माण सेना, नंदुरबार तालुक्याच्या वतीने काकर्दे येथे आयोजित करण्यात आलेला भव्य बैलपोळा उत्सव व बैलजोडी सजावट स्पर्धा मोठ्या उत्साहात आणि जल्लोषपूर्ण वातावरणात पार पडली. शेतकरी बांधवांनी आपल्या लाडक्या बैलजोडींना आकर्षक पद्धतीने सजवून उत्सवात सहभागी होत पारंपरिक कृषी संस्कृतीचे दर्शन घडविले.

बैलपोळा हा शेतकरी आणि बैल यांच्यातील अतूट नात्याचा सन्मान करणारा महत्त्वाचा सण आहे. वर्षभर शेतात शेतकऱ्याच्या खांद्याला खांदा लावून मेहनत करणाऱ्या बैलांप्रती कृतज्ञता व्यक्त करण्यासाठी काकर्दे येथे हा उत्सव उत्साहात साजरा करण्यात आला. सजवलेल्या बैलजोडी, पारंपरिक वातावरण आणि ग्रामस्थांचा उत्स्फूर्त सहभाग यामुळे संपूर्ण परिसरात उत्सवी वातावरण निर्माण झाले होते.

यावेळी आयोजित बैलजोडी सजावट स्पर्धेत शेतकरी बांधवांनी मोठ्या संख्येने सहभाग घेतला. आकर्षक सजावट आणि देखणेपणामुळे स्पर्धेला चांगला प्रतिसाद मिळाला.

🏆 स्पर्धेचा निकाल

🥇 प्रथम क्रमांक : श्री. भावसाहेब शामराव जाधव

🥈 द्वितीय क्रमांक : श्री. शांतीलाल मराठे

🥉 तृतीय क्रमांक : श्री. गणेश गुलाब खलाणे

🥉 तृतीय क्रमांक : श्री. गणेश दशरथ वाघ

🏅 चतुर्थ क्रमांक : श्री. घनश्याम राजहंस माळी

स्पर्धेतील विजेत्यांचा राकेश पुंडलिक माळी यांच्या हस्ते नारळ व सन्मानचिन्ह देऊन गौरव करण्यात आला. विजेत्यांचे उपस्थित मान्यवर, ग्रामस्थ व आयोजकांकडून अभिनंदन करण्यात आले.

यावेळी “शेतकरी सुखी तर गाव सुखी” हा संदेश देत महाराष्ट्राची समृद्ध कृषी संस्कृती आणि पारंपरिक सण-उत्सव जपण्यासाठी महाराष्ट्र नवनिर्माण सेना सदैव शेतकऱ्यांच्या पाठीशी राहील, असा निर्धार व्यक्त करण्यात आला.

या उत्सवासाठी सर्व मित्र परिवार व काकर्दे ग्रामस्थांचे विशेष सहकार्य लाभले.