🐂 बैलांच्या सजावटीने अंतुर्ली सजले; कृतज्ञतेच्या भावनेने बैलपोळा उत्साहात साजरा!

Byसंपादक स्वराज्य वार्ता लाईव्ह

Sep 10, 2026

मुक्ताईनगर तालुक्यातील अंतुर्ली येथे शेतकऱ्यांकडून बैलांची पूजा; पुरणपोळीचा नैवेद्य देत अन्नदात्या पशुधनाप्रती व्यक्त केली कृतज्ञता

अंतुर्ली प्रतिनिधी, किरण पाटील.

मुक्ताईनगर तालुक्यातील अंतुर्ली येथे शेतकरी बांधवांचा जिव्हाळ्याचा आणि शेती संस्कृतीशी घट्ट नाते सांगणारा बैलपोळा सण मोठ्या उत्साहात व भक्तिभावाने साजरा करण्यात आला. वर्षभर शेतात राबणाऱ्या बैलांप्रती कृतज्ञता व्यक्त करण्यासाठी शेतकऱ्यांनी आपल्या बैलांची विशेष सजावट करून त्यांची विधिवत पूजा केली.

बैलपोळ्यानिमित्त सकाळपासूनच शेतकरी बांधवांनी बैलांना स्वच्छ धुऊन त्यांना विविध रंगांनी सजवले. बैलांच्या शिंगांना रंगरंगोटी करण्यात आली असून, घागरमाळा, फुलांचे हार, आकर्षक झुला आणि झगमगती सजावट करून बैलांना नटवण्यात आले. काही शेतकऱ्यांनी बैलांच्या अंगावर विविध संदेशही लिहून सणाचे वेगळेपण अधोरेखित केले.

यानंतर घराघरांत बैलांची पूजा करण्यात आली. बैलांना पुरणपोळी, वरण-भात आदी पदार्थांचा नैवेद्य दाखवून त्यांना प्रेमाने भोजन देण्यात आले. वर्षातील ३६५ दिवस शेतकऱ्याच्या खांद्याला खांदा लावून शेतीच्या कामात साथ देणाऱ्या बैलांप्रती कृतज्ञता व्यक्त करण्याची परंपरा या सणातून जपली जाते.

शेती संस्कृती, शेतकरी आणि पशुधन यांच्यातील अतूट नाते अधोरेखित करणारा बैलपोळा हा केवळ सण नसून कृतज्ञता, आपुलकी आणि सहजीवनाचा संदेश देणारी समृद्ध परंपरा आहे. अंतुर्ली गावातही याच भावनेने बैलपोळा उत्साहपूर्ण वातावरणात साजरा करण्यात आला.