🦠 नाशिकमध्ये स्वाइन फ्लूचा वाढता धोका; १० दिवसांत ६६ रुग्णांची नोंद

विभागीय प्रतिनिधी, महेशप्रसाद दिक्षित.

नाशिक : वातावरणातील बदल आणि साथीच्या आजारांच्या वाढत्या प्रादुर्भावाच्या पार्श्वभूमीवर नाशिक शहरात स्वाइन फ्लूनेही डोके वर काढले आहे. गेल्या दहा दिवसांत तब्बल ६६ जणांना स्वाइन फ्लूची लागण झाल्याची माहिती समोर आली असून, दररोज सरासरी सहा नव्या रुग्णांची भर पडत आहे. त्यामुळे महापालिका आरोग्य यंत्रणेची चिंता वाढली आहे. बाधित रुग्णांवर सध्या विविध खासगी रुग्णालयांमध्ये उपचार सुरू आहेत.

गेल्या महिनाभरात स्वाइन फ्लूमुळे तीन जणांचा मृत्यू झाल्याची माहिती आहे. मृतांपैकी दोन रुग्ण ग्रामीण भागातील, तर एक रुग्ण नाशिक शहर हद्दीतील असल्याचे सांगण्यात येत आहे. स्वाइन फ्लूच्या वाढत्या संसर्गामुळे नागरिकांमध्येही चिंतेचे वातावरण निर्माण झाले आहे.

शहरातील विविध रुग्णालयांच्या बाह्यरुग्ण विभागांमध्ये ताप, सर्दी, खोकला, अंगदुखी यांसारखी लक्षणे असलेल्या रुग्णांची संख्या वाढताना दिसत आहे. त्यातच डेंग्यू आणि मलेरियाच्या रुग्णसंख्येतही वाढ होत असल्याने आरोग्य व्यवस्थेवर अतिरिक्त ताण निर्माण झाला आहे.

स्वाइन फ्लूची सुरुवातीची लक्षणे साध्या सर्दी-खोकल्यासारखी वाटू शकतात. मात्र, वेळेत उपचार न मिळाल्यास संसर्ग गंभीर होऊन फुफ्फुसांमध्ये संसर्ग किंवा न्यूमोनियासारख्या गुंतागुंती निर्माण होण्याची शक्यता असते.

महापालिकेचे स्वाइन फ्लू कक्ष मात्र रिकामे

स्वाइन फ्लूचा वाढता प्रादुर्भाव लक्षात घेऊन महापालिका आरोग्य विभागाने नाशिक रोड येथील बिटको रुग्णालय आणि पंचवटीतील डॉ. झाकीर हुसेन रुग्णालयात प्रत्येकी १० खाटांचे स्वतंत्र स्वाइन फ्लू कक्ष सज्ज ठेवले आहेत. मात्र, अनेक रुग्ण उपचारासाठी खासगी रुग्णालयांना पसंती देत असल्याने महापालिकेच्या या कक्षांमध्ये सध्या फारशी रुग्णसंख्या नसल्याचे चित्र आहे.

लक्षणे जाणवताच वैद्यकीय तपासणी करा

ताप, सर्दी, खोकला किंवा अंगदुखी यांसारखी लक्षणे जाणवल्यास नागरिकांनी आजाराकडे दुर्लक्ष करू नये. वेळ न दवडता जवळच्या रुग्णालयात वैद्यकीय तपासणी करून घ्यावी, असे आवाहन महापालिकेचे वैद्यकीय अधिकारी डॉ. प्रशांत शेटे यांनी केले आहे. स्वाइन फ्लूची शक्यता असल्यास विलंब न करता उपचार सुरू करणे महत्त्वाचे असल्याचेही त्यांनी स्पष्ट केले.