पातोंडीत ट्रॅक्टर जप्त; पिंपरी नदीपात्रातून केऱ्हाळा मार्गे वाहतूक सुरूच असल्याचा नागरिकांचा आरोप — ‘आशीर्वाद कोणाचा?’ संतप्त सवाल
जळगाव जिल्हा प्रतिनिधी, नूर महमद तडवी
रावेर : रावेर तालुक्यात अवैध वाळू उत्खनन आणि वाहतुकीविरोधात महसूल प्रशासनाने कारवाईचा धडाका सुरू केला आहे. प्रभारी तहसीलदार संजय तायडे यांच्या मार्गदर्शनाखाली महसूल पथकाने पातोंडी शिवारात धडक कारवाई करत अवैधरीत्या वाळू वाहतूक करणारा ट्रॅक्टर पकडून तहसील कार्यालयात जप्त केला. या कारवाईमुळे अवैध वाळू वाहतूक करणाऱ्यांमध्ये खळबळ उडाली आहे.
शुक्रवार, दि. ४ सप्टेंबर २०२६ रोजी रात्री सुमारे ११ वाजता गोपनीय माहितीच्या आधारे पातोंडी शिवारात ही कारवाई करण्यात आली. तहसीलदार संजय तायडे यांच्या मार्गदर्शनाखाली तलाठी पथकातील ग्राम महसूल अधिकारी प्रशांत जाधव आणि सुधीर इंगळे यांनी कारवाईत सहभाग घेतला. जप्त करण्यात आलेल्या ट्रॅक्टरवर नियमानुसार दंडात्मक कारवाईची प्रक्रिया सुरू करण्यात आली आहे.
महसूल विभाग अॅक्शन मोडमध्ये
रावेर तालुक्यात अवैध वाळू उपसा आणि वाहतुकीला आळा घालण्यासाठी महसूल विभागाने विशेष मोहीम हाती घेतल्याचे या कारवाईतून दिसून येत आहे. दिवसा तसेच रात्रीच्या वेळी चोरट्या मार्गाने होणाऱ्या वाळू वाहतुकीवर प्रशासनाचे लक्ष असल्याचे सांगण्यात येत आहे.
मात्र, एका बाजूला पातोंडी येथे ट्रॅक्टर पकडले जात असताना दुसऱ्या बाजूला पिंपरी नदीपात्रातून केऱ्हाळा मार्गे वाळू वाहतूक सुरू असल्याचा आरोप नागरिकांकडून केला जात आहे.
‘पातोंडीत ट्रॅक्टर पकडला, मग पिंपरी नदीपात्राचे काय?’
पिंपरी नदीपात्रातून कथितरीत्या सुरू असलेल्या वाळू उपशामुळे शासनाचा महसूल बुडत असून नदीपात्र आणि पर्यावरणावरही परिणाम होण्याची शक्यता व्यक्त केली जात आहे. त्यामुळे ‘एका ट्रॅक्टरवर कारवाई करून प्रश्न सुटणार आहे का?’ असा सवाल नागरिक उपस्थित करत आहेत.
पिंपरी नदीपात्रातून सुरू असल्याचे सांगितले जाणारे वाळू उत्खनन आणि वाहतूक नेमकी कोणाच्या आशीर्वादाने सुरू आहे? संबंधित यंत्रणेचे याकडे दुर्लक्ष का होत आहे? या वाहतुकीवर कारवाई कधी होणार? असे प्रश्न आता नागरिकांमधून उपस्थित होत आहेत.
कारवाई केवळ वाहनांवर नव्हे, तर मुळावर हवी!
महसूल प्रशासनाने एखाद-दुसरे वाहन पकडण्यापुरती कारवाई मर्यादित न ठेवता अवैध वाळू उपसा करणारे ठिकाण, वाहतूक मार्ग आणि त्यामागील संपूर्ण साखळी शोधून कठोर कारवाई करावी, अशी मागणी नागरिकांकडून होत आहे.
‘एक ट्रॅक्टर पकडला, पण पिंपरी नदीपात्रातील वाळू वाहतूक थांबली का?’ या प्रश्नाचे उत्तर आता प्रशासनाला द्यावे लागणार आहे. पिंपरी नदीपात्रातील कथित अवैध वाळू वाहतुकीवर महसूल विभाग पुढील काळात कोणती भूमिका घेतो, याकडे रावेर तालुक्यातील नागरिकांचे लक्ष लागले आहे.