जळगांव प्रतिनिधी, महेश माळी.
मेहरूण : श्रीकृष्ण जयंतीचे औचित्य साधून श्री संत ज्ञानेश्वर प्राथमिक व माध्यमिक विद्यालयाच्या प्राथमिक विभागातर्फे दप्तरमुक्त उपक्रमांतर्गत ‘शैक्षणिक दहीहंडी’ हा अभिनव उपक्रम उत्साहात राबविण्यात आला. पारंपरिक दहीहंडीला शैक्षणिक उपक्रमाची जोड देत विद्यार्थ्यांना खेळातून आनंददायी व अनुभवाधारित शिक्षण देण्यात आले.
दहीहंडीला विविध शब्दपट्ट्यांनी सजविण्यात आले होते. ‘ज्ञान’, ‘विचार’, ‘कृती’, ‘सहकार्य’, ‘नेतृत्व’, ‘सर्जनशीलता’, ‘संवाद’, ‘निरीक्षण’, ‘तर्कशक्ती’, ‘निर्णयक्षमता’, ‘जिज्ञासा’ आणि ‘समस्या-निवारण’ अशा शब्दांचा त्यामध्ये समावेश करण्यात आला. विद्यार्थ्यांनी या शब्दपट्ट्या ओळखून त्यांचा अर्थ, उपयोग आणि दैनंदिन जीवनातील महत्त्व समजून घेतले.
दप्तरमुक्त वातावरणात विद्यार्थ्यांनी विविध शैक्षणिक कृतींमध्ये उत्स्फूर्त सहभाग घेतला. खेळ, कृती, प्रश्नोत्तर, निरीक्षण व सहकार्य यांच्या माध्यमातून विद्यार्थ्यांच्या विचारशक्तीला चालना देण्यात आली. त्यामुळे केवळ पाठांतरावर भर न देता विद्यार्थ्यांना प्रत्यक्ष अनुभवातून शिकण्याची संधी मिळाली.
या उपक्रमातून संवादकौशल्य, संघभावना, सर्जनशील विचार, चिकित्सक विचार, समस्या सोडविण्याची क्षमता, निर्णयक्षमता, नेतृत्वगुण आणि आत्मविश्वास यांसारख्या २१व्या शतकातील कौशल्यांचा विकास साधण्याचा प्रयत्न करण्यात आला.
श्रीकृष्ण जयंतीनिमित्त विद्यार्थ्यांना केळीचा आरोग्यदायी प्रसाद वाटप करण्यात आला. पारंपरिक उत्सवाला शैक्षणिक उपक्रमाची जोड देतानाच विद्यार्थ्यांना पौष्टिक आहाराचे महत्त्वही सांगण्यात आले.
‘दप्तराचे ओझे कमी, अनुभवातून शिक्षण अधिक’ या संकल्पनेला अधोरेखित करणारा हा उपक्रम विद्यार्थ्यांसाठी आनंददायी, कृतीशील आणि ज्ञानवर्धक ठरला. शिक्षकांच्या मार्गदर्शनाखाली विद्यार्थ्यांनी उत्स्फूर्त सहभाग नोंदविला.