आमदार अमोल जावळेंच्या निधीवरून दावा-प्रतिदावा; नगरसेविका नंदाताई महाजनांचा आरोप—“कामाचे श्रेय लाटण्याचा प्रयत्न”
विभागीय प्रतिनिधी, महेशप्रसाद दिक्षित.
यावल शहरातील नागरिकांसाठी महत्त्वाच्या ठरणाऱ्या उद्यानाच्या कामावरून शहरातील राजकीय वातावरण पुन्हा तापले आहे. उद्यानासाठी उपलब्ध झालेल्या एक कोटी रुपयांच्या निधीचे श्रेय आणि कामाच्या प्रगतीवरून आमदार अमोल जावळे यांच्या दाव्याला भाजपच्या नगरपालिकेतील गटनेत्या तथा नगरसेविका नंदाताई राजेंद्र महाजन यांनी आक्षेप घेतला आहे.
आमदार अमोल जावळे यांनी आपल्या प्रयत्नांतून एक कोटी रुपयांचा निधी उपलब्ध करून देत उद्यानाचे काम सुरू झाल्याचा दावा केला होता. मात्र, नंदाताई महाजन यांनी यावर भाष्य करताना, उद्यानाचे काम यापूर्वीच सुमारे ७० ते ८० टक्के पूर्ण झाले असताना आता राजकीय श्रेय घेण्याचा प्रयत्न केला जात असल्याचा आरोप केला आहे.
“जनतेला विकासकामांबाबत सत्य माहिती मिळणे आवश्यक आहे. केवळ राजकीय श्रेयासाठी कामांची वेगळी मांडणी करणे योग्य नाही,” असे महाजन यांनी स्पष्ट केले. विकासकामांच्या श्रेयावरून वाद निर्माण करण्यापेक्षा कामाची गुणवत्ता आणि नागरिकांना मिळणाऱ्या सुविधांना प्राधान्य देणे गरजेचे आहे, असेही त्यांनी नमूद केले.
दरम्यान, आमदार अमोल जावळे यांनी उपलब्ध करून दिलेल्या एक कोटी रुपयांच्या निधीतून नव्या उद्यानाचे काम प्रत्यक्ष सुरू झाले असून, त्यातील सुमारे ७० ते ८० टक्के काम पूर्ण झाल्याची माहिती देण्यात आली आहे. उर्वरित काम नियोजित पद्धतीने पूर्ण झाल्यानंतर यावलकरांना लवकरच उद्यानाची सुविधा मिळेल, असा विश्वास व्यक्त करण्यात आला आहे.
महाजन यांनी विरोधकांच्या आरोपांना उत्तर देताना, “आमदारांनी निधी आणला, काम सुरू केले; मात्र श्रेय लाटण्याचा प्रयत्न दुसऱ्यांकडून होत आहे,” असा प्रत्यारोप केला. कामाला मंजुरी मिळण्यापूर्वीच निधी उपलब्ध करून देण्यासाठी प्रयत्न करण्यात आले आणि त्यानंतर प्रत्यक्ष कामाला सुरुवात झाल्याचेही त्यांनी सांगितले.
त्यामुळे यावलमधील उद्यानाच्या कामावरून आता निधी कोणी आणला, मंजुरी कोणी मिळवून दिली आणि प्रत्यक्ष कामाला सुरुवात नेमकी कधी झाली, या प्रश्नांवरून राजकीय आरोप-प्रत्यारोपांना उधाण आले आहे. संबंधितांनी निधी मंजुरी, प्रशासकीय आदेश आणि कामाशी संबंधित कागदपत्रे जनतेसमोर मांडल्यास या वादातील वस्तुस्थिती अधिक स्पष्ट होण्याची शक्यता आहे.
दरम्यान, राजकीय श्रेयाच्या या वादापेक्षा उद्यानाचे काम दर्जेदार आणि वेळेत पूर्ण होऊन यावलकरांना प्रत्यक्ष सुविधा कधी मिळते, याकडेच नागरिकांचे लक्ष लागले आहे.