🚨 मोकाट जनावरांवर नगरपरिषदेचा दंडाचा बडगा; नागरिकांना जनावरे गोठ्यात बांधण्याचे आवाहन

जळगाव | चोपडा प्रतिनिधी – यज्ञेश्वर पाटील

चोपडा शहरात दिवसेंदिवस वाढत असलेल्या मोकाट जनावरांच्या समस्येवर चोपडा नगरपरिषद प्रशासनाने कठोर भूमिका घेतली आहे. लोकनियुक्त नगराध्यक्षा सौ. नम्रता ताई सचिन पाटील यांनी शहरातील नागरिकांना विशेष आवाहन करत, मालकीची जनावरे रस्त्यावर मोकाट सोडू नयेत व ती गोठ्यात बांधून ठेवावीत, असे स्पष्ट केले आहे.

शहरातील मुख्य रस्ते, चौक व वर्दळीच्या भागात मोकाट जनावरे फिरत असल्यामुळे वाहतुकीला अडथळा निर्माण होत असून अपघातांची शक्यता वाढली आहे. विशेषतः लहान मुले, ज्येष्ठ नागरिक आणि दुचाकीस्वारांच्या सुरक्षिततेचा प्रश्न गंभीर बनला आहे. यामुळे नागरिकांमध्ये चिंतेचे वातावरण निर्माण झाले आहे.

नगरपरिषद प्रशासनाने स्पष्ट इशारा दिला आहे की, यापुढे रस्त्यावर मोकाट जनावरे आढळल्यास संबंधित मालकांवर नियमानुसार दंडात्मक कारवाई करण्यात येईल. तसेच शहराची स्वच्छता, वाहतुकीची शिस्त आणि नागरिकांची सुरक्षितता राखण्यासाठी सर्वांनी प्रशासनाला सहकार्य करण्याचे आवाहन करण्यात आले आहे.

नगराध्यक्षा सौ. नम्रता ताई सचिन पाटील यांनी नागरिकांना जबाबदारीची जाणीव ठेवून जनावरे गोठ्यात बांधण्याचे आणि शहराला सुरक्षित, स्वच्छ व अपघातमुक्त ठेवण्यासाठी सहकार्य करण्याचे आवाहन केले आहे.