स्वराज्य वार्ता न्यूज – तुळजापूर
तुळजापूर (धाराशिव) : शारदीय नवरात्र उत्सवाच्या पार्श्वभूमीवर भाविकांच्या आरोग्याशी खेळणाऱ्या भेसळखोरांवर अन्न व औषध प्रशासनाने (FDA) मोठी धडक कारवाई केली आहे. तुळजापूर शहरात ५१० किलो भेसळयुक्त खवा जप्त करण्यात आला असून, या कारवाईने मिठाई व्यावसायिकांचे धाबे दणाणले आहेत.
मिळालेल्या माहितीनुसार, नवरात्रात खवा आणि मिठाईला मोठी मागणी असते. याच संधीचा फायदा घेत काही व्यावसायिक भेसळयुक्त, निकृष्ट दर्जाचा खवा बाजारात विक्रीसाठी आणतात. याची गुप्त माहिती FDA च्या पथकाला मिळाली होती.
तुळजापूर शहरातील एका गोदामावर आणि मिठाईच्या दुकानांवर FDA च्या पथकाने एकाच वेळी छापा टाकला. यावेळी तपासणीत हा खवा संशयास्पद आढळून आला. दुर्गंधी येत असलेला, रंग बदललेला सुमारे ५१० किलो खवा जागीच जप्त करण्यात आला.
लाखो रुपयांचा मुद्देमाल जप्त
जप्त केलेल्या खव्याची बाजारातील किंमत अंदाजे १ ते १.५ लाख रुपयांच्या घरात असल्याचे सांगण्यात येत आहे. FDA अधिकाऱ्यांनी या खव्याचे नमुने प्रयोगशाळेत तपासणीसाठी पाठवले असून, अहवाल आल्यानंतर संबंधित व्यापाऱ्यावर कठोर कायदेशीर कारवाई करण्यात येणार आहे.
तुळजाभवानी देवीच्या दर्शनासाठी नवरात्रात लाखो भाविक तुळजापुरात येतात. भाविकांना प्रसाद आणि मिठाईच्या माध्यमातून भेसळयुक्त पदार्थ मिळू नये यासाठी FDA ने विशेष मोहीम हाती घेतली आहे.
“सणासुदीच्या काळात नागरिकांच्या आरोग्याशी खेळ खपवून घेतला जाणार नाही. भेसळयुक्त अन्नपदार्थ विक्री करणाऱ्यांवर गुन्हे दाखल करून परवाना रद्द करण्यापर्यंत कारवाई केली जाईल,” असा इशारा FDA अधिकाऱ्यांनी दिला आहे.
या कारवाईमुळे तुळजापुरातील भेसळखोरांमध्ये चांगलीच खळबळ उडाली आहे. FDA ची ही मोहीम नवरात्रभर सुरू राहणार असल्याचे सांगण्यात येत आहे.