नंदुरबार जिल्हा प्रतिनिधी, राम ठक्कर.
शारदीय नवरात्रोत्सवाच्या पावन पर्वावर नंदुरबार शहर भक्तिरसात न्हाऊन निघाले. हिंदू सेवा सहाय्य समिती व लताई आरोग्यधाम यांच्या संयुक्त विद्यमाने शहरात ३०९ कन्यांचे विधिवत कन्यापूजन मोठ्या उत्साहात आणि भक्तिभावपूर्ण वातावरणात संपन्न झाले.
भारतीय संस्कृती ही नारीशक्तीला आदिशक्तीचे रूप मानणारी संस्कृती आहे. नवरात्र काळात कन्येमध्ये देवीचे स्वरूप पाहून तिचे पूजन करण्याची प्राचीन परंपरा आहे. याच परंपरेचे जतन करत आणि समाजात मुलींबद्दल आदर व सन्मानाची भावना दृढ व्हावी या उद्देशाने या सोहळ्याचे आयोजन करण्यात आले होते. ३०९ कन्यांचे पाद्यपूजन करून त्यांना सन्मानपूर्वक भेटवस्तू देण्यात आल्या. यावेळी संपूर्ण परिसरात मंगलमय आणि भक्तिमय वातावरण निर्माण झाले होते.
पाच वर्षांपासून अखंड परंपरा
हा केवळ एक वर्षाचा उपक्रम नसून हिंदू सेवा सहाय्य समितीच्या वतीने गेल्या पाच वर्षांपासून हा धार्मिक उपक्रम अखंडपणे सुरू आहे. दरवर्षी नवरात्रोत्सवात कन्यापूजनाच्या माध्यमातून धार्मिक संस्कार, भारतीय संस्कृती आणि नारीशक्तीप्रती कृतज्ञता व्यक्त केली जाते. यंदाचे पाचवे वर्षही मोठ्या उत्साहात पार पडले असून कन्यांच्या चेहऱ्यावरील आनंद आणि उपस्थित भाविकांचा उत्साह पाहण्यासारखा होता.
आजच्या आधुनिक युगात धार्मिक परंपरांसोबतच सामाजिक संस्कारांची रुजवणूक करणे गरजेचे आहे. कन्यापूजनासारखे उपक्रम केवळ धार्मिक विधी न राहता मुलींचे महत्त्व अधोरेखित करतात आणि समाजाला सकारात्मक संदेश देतात.
हिंदू सेवा सहाय्य समिती आणि लताई आरोग्यधाम यांच्या या संयुक्त उपक्रमामुळे भक्ती, श्रद्धा, संस्कार आणि नारीशक्तीचा सन्मान यांचा सुंदर संगम नंदुरबारकरांना अनुभवायला मिळाला. नवरात्रीच्या पावन पर्वावर आदिशक्तीचा सन्मान करणारा हा सोहळा नंदुरबारच्या धार्मिक-सामाजिक इतिहासात विशेष ठरला आहे.