🔴 जळगावमध्ये चारा बंदी लागू! जिल्हाबाहेर विक्री-वाहतुकीवर जिल्हाधिकाऱ्यांचा दणका, आदेश मोडल्यास थेट कारवाई!

जळगाव प्रतिनिधी

जळगाव जिल्ह्यात दुष्काळाचे सावट गडद होत असताना जिल्हा प्रशासनाने अत्यंत महत्त्वाचा आणि कडक निर्णय घेतला आहे. जिल्हाधिकारी रोहन घुगे यांनी भारतीय नागरिक सुरक्षा संहिता 2023 च्या कलम 163 अन्वये मोठा आदेश जारी केला आहे.

या आदेशानुसार, जळगाव जिल्ह्याच्या हद्दीतून इतर कोणत्याही जिल्ह्यात किंवा राज्याबाहेर सर्व प्रकारच्या सुक्या व ओल्या चाऱ्याची वाहतूक आणि विक्री करण्यास सक्त मनाई करण्यात आली आहे.

का घेण्यात आला हा निर्णय?

सध्या जळगाव जिल्ह्यात चाऱ्याची मागणी वाढली असून, काही व्यापाऱ्यांकडून जिल्ह्यातील चारा जास्त भाव मिळवण्यासाठी परजिल्ह्यात आणि परराज्यात पाठवला जात आहे. अशा प्रकारे चारा मोठ्या प्रमाणावर बाहेर गेल्यास भविष्यात जळगाव जिल्ह्यात जनावरांसाठी गंभीर चारा टंचाई निर्माण होण्याची भीती आहे.

या पार्श्वभूमीवर जिल्हा उपआयुक्त, पशुसंवर्धन व दुग्ध व्यवसाय विभागाने जिल्हाधिकाऱ्यांकडे चाऱ्याची वाहतूक रोखण्याची मागणी केली होती. त्यानुसार हा प्रतिबंधात्मक आदेश काढण्यात आला आहे.

आदेशाचा भंग केल्यास काय होणार?

हा आदेश तात्काळ लागू करण्यात आला आहे. जो कोणी व्यक्ती, व्यापारी किंवा वाहन चालक या आदेशाचा भंग करून चाऱ्याची अवैध वाहतूक करताना आढळून आल्यास त्याच्यावर भारतीय नागरिक सुरक्षा संहिता 2023 अंतर्गत कडक कायदेशीर कारवाई करण्यात येणार आहे. तसेच वाहन जप्त करण्याची कारवाईही होणार आहे.

जिल्हा प्रशासनाच्या या निर्णयामुळे जिल्ह्यातील पशुपालकांना मोठा दिलासा मिळाला असून, चारा माफियांना मात्र चांगलाच चाप बसला आहे.