माता -पालक मेळाव्यात विद्यार्थ्यांच्या सर्वांगीण विकासावर भर; कला शिक्षणासह विविध उपक्रमांबाबत मार्गदर्शन

जळगांव प्रतिनिधी, महेश माळी.

मेहरुण : श्री संत ज्ञानेश्वर प्राथमिक व माध्यमिक विद्यालय, मेहरुण येथे सोमवार, दि. ३१ ऑगस्ट २०२६ रोजी द्वितीय पालक मेळावा उत्साहात संपन्न झाला. विद्यार्थ्यांची शैक्षणिक प्रगती, उपस्थिती, अभ्यासातील अडचणी तसेच विद्यार्थ्यांच्या सर्वांगीण विकासासाठी शाळेत राबविण्यात येणाऱ्या विविध उपक्रमांबाबत पालकांना मार्गदर्शन करण्यात आले.

पालक मेळाव्यात विशेषतः कला शिक्षणावर भर देण्यात आला. विद्यार्थ्यांमधील सुप्त कलागुणांना वाव मिळावा, त्यांची सर्जनशीलता, कल्पनाशक्ती, एकाग्रता व आत्मविश्वास वाढावा, यासाठी चित्रकला, रेखाचित्र, रंगकाम, हस्तकला, कागदकाम, टाकाऊ वस्तूंपासून कलाकृती निर्मिती, संगीत, नृत्य व अभिनय अशा विविध कला उपक्रमांमध्ये विद्यार्थ्यांचा सहभाग वाढविण्याचे आवाहन करण्यात आले.

“प्रत्येक मुलामध्ये एक कलाकार दडलेला असतो. त्याच्या कलागुणांना प्रोत्साहन देणे ही शाळेसोबतच पालकांचीही जबाबदारी आहे,” असा संदेश पालकांना देण्यात आला. मुलांच्या कलाकृतींमध्ये चुका शोधण्याऐवजी त्यांच्या प्रयत्नांचे व कल्पकतेचे कौतुक करावे, तसेच घरच्या घरीही मुलांना सर्जनशील उपक्रमांसाठी वेळ द्यावा, असे मार्गदर्शन करण्यात आले.

यावेळी विद्यार्थ्यांच्या शैक्षणिक प्रगतीचा आढावा घेऊन वाचन, लेखन, गणितीय कौशल्ये आणि विषयातील अडचणी असलेल्या विद्यार्थ्यांसाठी उपचारात्मक अध्यापन (Remedial Classes) राबविण्याबाबतही पालकांना माहिती देण्यात आली. विद्यार्थ्यांच्या प्रगतीसाठी शाळा आणि पालक यांच्यात सातत्यपूर्ण संवाद व सहकार्य आवश्यक असल्याचे सांगण्यात आले.

शाळेच्या पर्यावरणपूरक उपक्रमांनाही पालकांनी सहकार्य करावे, असे आवाहन करण्यात आले. बीज बँक, वृक्षसंवर्धन, स्वच्छता, टाकाऊ वस्तूंचा पुनर्वापर आणि पर्यावरण संवर्धनाशी संबंधित उपक्रमांमध्ये पालकांनी सक्रिय सहभाग घेण्याबाबत चर्चा करण्यात आली.

पालकांनी शाळेच्या विविध उपक्रमांना उत्स्फूर्त प्रतिसाद देत विद्यार्थ्यांच्या सर्वांगीण विकासासाठी शाळेला सहकार्य करण्याची भूमिका व्यक्त केली. पालकांच्या सूचनाही यावेळी जाणून घेण्यात आल्या.

कार्यक्रमाला पर्यवेक्षिका शितल कोळी, सर्व शिक्षक व शिक्षकेतर कर्मचारी, विद्यार्थी तसेच पालक उपस्थित होते. कार्यक्रमाचे नियोजन व आयोजन शाळेच्या वतीने करण्यात आले.

शाळा आणि पालक यांच्या समन्वयातून विद्यार्थ्यांच्या शैक्षणिक गुणवत्तेसोबतच त्यांच्या कला, कौशल्ये, संस्कार आणि व्यक्तिमत्त्व विकासाला चालना देण्याचा संकल्प यावेळी करण्यात आला.