🚆 जळगाव रेल्वे स्थानकाला नवी सुविधा; छत्रपती शिवाजी नगरकडील नूतन तिकीट घराचे लोकार्पण!

प्रवाशांची मोठी सोय होणार; तिकीटासाठी वेळ व गर्दी कमी होण्यास मदत — विकासकामांचा पाठपुरावा सुरूच

जळगाव | जिल्हा प्रतिनिधी निलेश खैरनार

जळगाव रेल्वे स्थानकावर प्रवाशांच्या सुविधांमध्ये आणखी एका महत्त्वपूर्ण सुविधेची भर पडली आहे. छत्रपती शिवाजी नगर बाजूकडील नूतन तिकीट घराचे उद्घाटन आमदार राजूमामा भोळे यांच्या प्रमुख उपस्थितीत करण्यात आले. यावेळी नवीन तिकीट खिडकीतून स्वतः प्लॅटफॉर्म तिकीट काढून या सुविधेचे लोकार्पण करण्यात आले.

या नूतन तिकीट घरामुळे छत्रपती शिवाजी नगर परिसरातील नागरिकांसह रेल्वे प्रवाशांची मोठी सोय होणार आहे. तिकीट खरेदीसाठी लागणारा वेळ कमी होण्यास मदत होणार असून, रेल्वे स्थानकावरील गर्दीचे व्यवस्थापन अधिक प्रभावीपणे करता येणार आहे.

केंद्र सरकार आणि भारतीय रेल्वेच्या माध्यमातून प्रवाशांना आधुनिक व दर्जेदार सुविधा उपलब्ध करून देण्यासाठी सातत्याने प्रयत्न सुरू आहेत. जळगाव रेल्वे स्थानकाचा सर्वांगीण विकास, आधुनिक सुविधा आणि प्रवाशांच्या सोयीसाठी आवश्यक पायाभूत सुविधा उपलब्ध करून देण्यासाठी सातत्याने पाठपुरावा सुरू ठेवणार असल्याचे यावेळी सांगण्यात आले.

मान्यवरांची उपस्थिती

या लोकार्पण सोहळ्याला भाजपा महानगर अध्यक्ष दीपकभाऊ सूर्यवंशी, भुसावळ विभागाचे विभागीय रेल्वे व्यवस्थापक (DRM) पुनीत अग्रवाल, सभापती डॉ. चंद्रशेखर पाटील, भारतीय जनता पार्टीचे नगरसेवक, विविध पदाधिकारी तसेच रेल्वे प्रशासनातील अधिकारी व कर्मचारी उपस्थित होते.

नूतन तिकीट घर सुरू झाल्याने छत्रपती शिवाजी नगरकडून रेल्वे स्थानकात येणाऱ्या प्रवाशांना तिकीटासाठी मुख्य प्रवेशद्वाराकडे जाण्याची आवश्यकता कमी होणार असून, स्थानकाच्या दोन्ही बाजूंनी प्रवाशांना अधिक सुलभ सेवा उपलब्ध होणार आहे.

जळगाव रेल्वे स्थानकाच्या विकासाच्या दृष्टीने ही सुविधा महत्त्वपूर्ण पाऊल मानली जात असून, आगामी काळातही प्रवाशांच्या सोयीसाठी आणखी सुविधा उपलब्ध होण्याची अपेक्षा व्यक्त केली जात आहे.