🚨 रावेर शहरातील स्वच्छतेचा गंभीर प्रश्न ऐरणीवर; सार्वजनिक शौचालयांची उभारणी करा, अन्यथा आंदोलन – वसीम शेख यांचा इशारा

रावेर | प्रतिनिधी, नूर महम्मद तडवी.

तालुक्याचे मुख्य ठिकाण असलेल्या रावेर शहरात दररोज परिसरातील अनेक गावांमधून नागरिक विविध शासकीय, व्यावसायिक व वैयक्तिक कामांसाठी येत असतात. विशेषतः महिला, ज्येष्ठ नागरिक आणि विद्यार्थ्यांना शहरात सार्वजनिक स्वच्छतागृहांची सुविधा नसल्याने मोठ्या गैरसोयीला सामोरे जावे लागत असल्याचा मुद्दा आता पुन्हा ऐरणीवर आला आहे.

या पार्श्वभूमीवर सामाजिक कार्यकर्ते वसीम शेख यांनी रावेर नगरपालिकेचे मुख्याधिकारी यांना निवेदन सादर करून शहरातील गर्दीच्या व प्रमुख ठिकाणी तातडीने सार्वजनिक शौचालय व बाथरूम उभारण्याची मागणी केली आहे.

निवेदनात गांधी चौक, डॉ. बाबासाहेब आंबेडकर पुतळा परिसर, स्टेशन रोड आणि छॉर्या मार्केट या ठिकाणी स्वच्छतागृहांची उभारणी करण्याची आवश्यकता अधोरेखित करण्यात आली आहे. या भागांमध्ये नागरिकांची सतत वर्दळ असल्याने अशा सुविधांचा अभाव हा गंभीर सार्वजनिक प्रश्न बनल्याचे त्यांनी नमूद केले.

यावेळी वसीम शेख यांनी इशारा देत सांगितले की, “ग्रामीण भागातून येणारे नागरिक, महिला आणि ज्येष्ठांची होणारी गैरसोय लक्षात घेऊन नगरपालिकेने तातडीने या मागणीची पूर्तता करावी. अन्यथा येत्या काही दिवसांत रावेर नगरपालिकेसमोर तीव्र आंदोलन छेडण्यात येईल.”

आता या मागणीकडे रावेर नगरपालिकेचे प्रशासन किती गांभीर्याने पाहते आणि नागरिकांच्या मूलभूत सुविधांसाठी कोणती पावले उचलते, याकडे सर्वांचे लक्ष लागले आहे.