जळगाव चोपडा प्रतिनिधी, यज्ञेश्वर पाटील.
चोपडा तालुक्यातील वराड गावात ट्रॅक्टरच्या हप्त्याच्या सततच्या दबाव आणि धमक्यांमुळे एका शेतकऱ्याने गळफास घेऊन आत्महत्या केल्याची घटना १६ जुलै २०२६ रोजी घडली. मृतकाने सोडलेल्या सुसाइड नोटमध्ये फायनान्स एजंट्सच्या नावाचा आणि रकमेचा स्पष्ट उल्लेख असल्याने प्रकरण गंभीर झाले आहे.
मृतक:
– योगेश बबनराव भोसले (रा. वराड, ता. चोपडा)
– फिर्यादी: प्रतीक योगेश भोसले (वय २१, मुलगा)
घटनेचा तपशील:
योगेश भोसले यांनी दीड वर्षापूर्वी स्वराज एक्सटी ७४४ ट्रॅक्टर कोटक महिंद्रा बँके कडून फायनान्सवर घेतला होता. तीन हप्ते नियमित भरल्यानंतर चौथ्या हप्त्याच्या (₹८५,०००) वेळी आर्थिक अडचण निर्माण झाली. यानंतर फायनान्स एजंट्स करण कोळी, निवृत्ती कोळी, नामदेव भोई यांनी वारंवार फोन करून पैसे मागणी केली आणि मानसिक त्रास दिला.
मृतकाने सुसाइड नोटमध्ये लिहिले आहे की,
“मी ८५००० रुपये बँकेतून काढून दिले तरी ट्रॅक्टर हिसकावून घेऊन गेले. २०,००० रुपये सतिशला (गा. नं. २०९५), १०,००० रुपये नामदेव भोई यांना व्याजाने घेतले (४ एप्रिल २०२६). दर महिन्याला व्याज दिले, तरी या महिन्याचे बाकी असल्याचे सांगून सतत त्रास देत आहेत…”
१६ जुलै २०२६ रोजी दुपारी १२ वाजण्याच्या सुमारास त्यांनी घरात गळफास घेऊन आत्महत्या केली. नातेवाईकांनी घटनास्थळी पोहोचून त्यांना खाली उतरवले, परंतु उपजिल्हा रुग्णालयात नेल्यावर त्यांना मृत घोषित करण्यात आले.
पोलीस कारवाई:
चोपडा ग्रामीण पोलीस स्टेशनने FIR क्र. ०१४०/२०२६ नोंदवली असून, भारतीय न्याय संहिता कलम १०८, ३५१(२) आणि ३(५) अंतर्गत गुन्हा दाखल केला आहे. इन्स्पेक्टर संजय जयराम सोनवणे यांच्याकडे तपास सोपवण्यात आला आहे.
फिर्यादी प्रतीक भोसले यांनी दिलेल्या फिर्यादीत म्हटले आहे की, सततच्या मानसिक त्रासामुळे वडील नैराश्यात गेले होते आणि त्यामुळे ही घटना घडली.
प्रतिक्रिया:
ही घटना ग्रामीण भागातील शेतकऱ्यांवर वाढणारा कर्जाचा बोजा आणि फायनान्स एजंट्सच्या आक्रमक वसुली पद्धतींचे द्योतक आहे. शेतकऱ्यांच्या मानसिक आरोग्याकडे गांभीर्याने लक्ष देण्याची गरज व्यक्त होत आहे.