🚩 गणेशोत्सवात जल्लोषासोबत सुरक्षेची जबाबदारीही महत्त्वाची; जळगाव पोलिसांचे नागरिकांना आवाहन

जळगांव प्रतिनिधी, सागर पाटील.

जळगाव : गणेशोत्सवाच्या पार्श्वभूमीवर जळगाव जिल्हा पोलिसांनी नागरिकांना उत्सव आनंदात, शांततेत आणि सुरक्षित वातावरणात साजरा करण्याचे आवाहन केले आहे. “उत्सव आनंदाचा… जबाबदारी सुरक्षेची!” असा संदेश देत गणेशोत्सव काळात शांतता, शिस्त आणि सुरक्षितता जपण्याचे आवाहन पोलिसांकडून करण्यात आले आहे.

गणेशोत्सव स्थापनेपासून विसर्जनापर्यंत नागरिकांनी सतर्क राहावे, असे आवाहन करण्यात आले असून, गर्दीच्या ठिकाणी मोबाईल, पाकीट किंवा मौल्यवान वस्तूंची चोरी झाल्यास, तसेच भांडण, मारामारी किंवा अनुचित प्रकार घडल्यास तातडीने पोलिसांशी संपर्क साधण्याचे सांगण्यात आले आहे.

महिला व बालकांच्या सुरक्षेबाबत कोणतीही समस्या निर्माण झाल्यास किंवा संशयास्पद व्यक्ती अथवा वस्तू आढळल्यास नागरिकांनी विलंब न करता पोलिसांना माहिती द्यावी. गणेशोत्सवादरम्यान कोणतीही आपत्कालीन परिस्थिती निर्माण झाल्यास तात्काळ ११२ या आपत्कालीन क्रमांकावर संपर्क साधावा, असेही पोलिसांनी स्पष्ट केले आहे.

गणेशोत्सव हा श्रद्धा, उत्साह आणि सामाजिक एकोप्याचा सण आहे. त्यामुळे उत्सव साजरा करताना नागरिकांनी कायदा व सुव्यवस्था, शांतता आणि सामाजिक सलोखा अबाधित ठेवण्यासाठी पोलिसांना सहकार्य करावे, असे आवाहन जळगाव जिल्हा पोलिसांकडून करण्यात आले आहे.

“उत्सव साजरा करा… पण सुरक्षेची आणि सामाजिक सलोख्याची जबाबदारीही जपा!” 🚩 गणपती बाप्पा मोरया! 🙏