🌿 अडावद पोलिसांची गांजा शेतीवर धडक कारवाई!

१७५ गांजाची झाडे जप्त; संशयिताविरुद्ध NDPS कायद्यान्वये गुन्ह्याची प्रक्रिया सुरू

जळगाव जिल्हा प्रतिनिधी – यज्ञेश्वर पाटील

चोपडा तालुक्यातील देवझिरी-देवगड परिसरातील जंगलात सुरू असलेल्या कथित अवैध गांजा लागवडीवर अडावद पोलिसांनी धडक कारवाई करत १७५ गांजाची झाडे जप्त केली. या कारवाईमुळे परिसरात खळबळ उडाली असून, एका संशयिताविरुद्ध NDPS कायद्यान्वये गुन्हा दाखल करण्याची प्रक्रिया सुरू करण्यात आली आहे.

अडावद पोलीस ठाण्याच्या हद्दीत देवझिरी-देवगड परिसरातील जंगलात एका शेतामध्ये मोठ्या प्रमाणावर गांजाची अवैध लागवड करण्यात आल्याची गोपनीय माहिती पोलिसांना मिळाली होती. माहितीची खातरजमा करून पोलिसांनी तातडीने विशेष पथक तयार केले आणि संबंधित ठिकाणी धाड टाकली.

कारवाईदरम्यान पंचांसमक्ष शेताची पाहणी केली असता गांजाची लागवड झाल्याचे आढळून आले. त्यानंतर कायदेशीर प्रक्रिया पूर्ण करून पंचनामा करण्यात आला. यावेळी शेतातील लहान-मोठी अशी एकूण १७५ गांजाची झाडे पोलिसांनी जप्त केली.

संशयित कोण?

या प्रकरणात देवसिंग रावल्या बारेला याचे नाव समोर आले आहे. तो मूळचा सिंदखेडी, ता. वरला, जि. बडवानी (मध्य प्रदेश) येथील रहिवासी असून सध्या देवगड, अनेर नदीकिनारा, ता. चोपडा, जि. जळगाव येथे वास्तव्यास असल्याची माहिती पोलिसांनी दिली.

सदर प्रकरणी अडावद पोलीस ठाण्यात NDPS कायद्यान्वये गुन्हा दाखल करण्याची प्रक्रिया सुरू असून, या प्रकरणाचा पुढील तपास पोलिसांकडून करण्यात येत आहे.

वरिष्ठ अधिकाऱ्यांच्या मार्गदर्शनाखाली कारवाई

ही कारवाई जळगाव जिल्हा पोलीस अधीक्षक श्री. श्रीकांत धिवरे, अपर पोलीस अधीक्षक श्री. अशोक नखाते (चाळीसगाव) आणि DYSP श्री. सुनील पाटील (चोपडा उपविभाग) यांच्या मार्गदर्शनाखाली करण्यात आली.

कारवाईत सपोनि प्रशांत कंडारे (प्रभारी अधिकारी, अडावद पोलीस ठाणे), ग्रेड पोउपनि जितेंद्र सोनवणे, ASI नासिर तडवी, पोहेकॉ संजय धनगर, विनोद धनगर, शेषराव तोरे, भारत नाईक, किरण शिरसाठ, पोकॉ भूषण चव्हाण तसेच WPC दिव्या मराठे यांनी सहभाग घेतला.

अवैध गांजा लागवड व अमली पदार्थांच्या गैरव्यवहाराविरुद्ध यापुढेही कठोर कारवाया सुरूच राहतील, असा स्पष्ट इशारा पोलिसांनी दिला आहे.