🌍 ‘ढाई आखर’ पत्रलेखनातून विद्यार्थ्यांचा पर्यावरण संवर्धनाचा जागर!

शेठ ला. ना. सा. विद्यालयाच्या १४० विद्यार्थ्यांचा उत्स्फूर्त सहभाग; ‘माता पृथ्वीचे संरक्षण’ विषयावर पत्रातून दिला संवेदनशील संदेश

जळगाव प्रतिनिधी, महेश माळी.

भारतीय पोस्ट विभागातर्फे आयोजित करण्यात आलेल्या राष्ट्रीय ‘ढाई आखर’ पत्रलेखन स्पर्धेला जळगाव येथील शिक्षण प्रसारक मंडळ संचालित शेठ ला. ना. सा. विद्यालयाच्या विद्यार्थ्यांनी उत्स्फूर्त प्रतिसाद दिला. इयत्ता सहावी ते दहावीतील तब्बल १४० विद्यार्थ्यांनी सहभाग नोंदवत ‘माता पृथ्वीचे संरक्षण’ या विषयावर आपल्या भावना व विचार प्रभावीपणे मांडले.

विद्यार्थ्यांमध्ये लेखनाची सवय निर्माण होण्यासोबतच त्यांचे हस्तकौशल्य, कल्पकता, सर्जनशीलता आणि संवेदनशीलता विकसित व्हावी, या उद्देशाने या राष्ट्रीय पत्रलेखन स्पर्धेचे आयोजन करण्यात आले होते.

स्पर्धेत सहभागी विद्यार्थ्यांनी पोस्ट विभागाच्या आंतरदेशीय पत्रावर सुमारे ५०० शब्दांत पर्यावरण संरक्षण व संवर्धनाचे महत्त्व अधोरेखित केले. वाढते प्रदूषण, वृक्षतोड, प्लास्टिकचा वाढता वापर, पाण्याची नासाडी, जलप्रदूषण, जागतिक तापमानवाढ आणि ध्वनीप्रदूषण यांसारख्या गंभीर समस्यांवर विद्यार्थ्यांनी आपल्या पत्रातून चिंता व्यक्त केली.

या समस्यांवर उपाय म्हणून वृक्षारोपण, जलसंधारण, स्वच्छता, प्लास्टिकचा मर्यादित वापर तसेच सण-उत्सवांमध्ये पारंपरिक व कर्णमधुर वाद्यांचा वापर करण्याचे आवाहन विद्यार्थ्यांनी केले. पर्यावरणपूरक जीवनशैलीचा स्वीकार करून पृथ्वीचे रक्षण करण्याचा प्रभावी संदेश त्यांच्या लेखणीतून उमटला.

‘पृथ्वी मातेने आपल्याला सुंदर निसर्ग दिला आहे आणि त्याचे संरक्षण करणे ही प्रत्येकाची जबाबदारी आहे,’ असा संवेदनशील विचार विद्यार्थ्यांच्या पत्रांमधून व्यक्त झाला. त्यामुळे या स्पर्धेला केवळ पत्रलेखनाचा उपक्रम न राहता निसर्ग संवर्धनाची जनजागृती करणाऱ्या चळवळीचे स्वरूप प्राप्त झाले.

यावेळी विद्यालयाचे मुख्याध्यापक श्री. सचिन देशपांडे, उपमुख्याध्यापक श्री. संजय वानखेडे, पर्यवेक्षिका सौ. रमा तारे आणि पर्यवेक्षक श्री. जगदीश साळुंखे यांनी उपस्थित राहून विद्यार्थ्यांचे कौतुक केले. पत्रलेखनातून घेतलेले ‘पृथ्वी माता संरक्षणाचे वचन’ प्रत्यक्ष कृतीत उतरवावे, असे आवाहन त्यांनी केले.

हा उपक्रम यशस्वी करण्यासाठी श्रीमती संपदा तुंबळे, सौ. योगिता तडवी, सौ. रुपाली महाजन, सौ. मधुश्री मदाने, सौ. मनिषा पवार तसेच विद्यालयातील सर्व शिक्षक व शिक्षकेतर कर्मचाऱ्यांनी सहकार्य केले.