🔥 एमआयडीसीतील आनंद बॅटरी कंपनी चोरीचा पर्दाफाश! सहा चोरटे जेरबंद; ३३० किलो शिशाच्या धातूच्या प्लेट्ससह ₹१.२७ लाखांचा मुद्देमाल हस्तगत

जळगाव प्रतिनिधी, सागर पाटील.

जळगाव शहरातील एमआयडीसी परिसरातील ई-सेक्टरमध्ये असलेल्या श्री आनंद बॅटरी कंपनीत झालेल्या चोरीचा एमआयडीसी पोलिसांनी अवघ्या काही दिवसांत छडा लावत सहा आरोपींना जेरबंद केले आहे. आरोपींकडून चोरीस गेलेल्या शिशाच्या धातूच्या प्लेट्ससह गुन्ह्यात वापरलेली मोटारसायकल असा एकूण ₹१ लाख २७ हजार ५०० रुपयांचा मुद्देमाल हस्तगत करण्यात आला आहे.

पोलिसांनी दिलेल्या माहितीनुसार, दि. ३१ ऑगस्ट २०२६ रोजी रात्री ९ वाजेपासून १ सप्टेंबर रोजी मध्यरात्रीपर्यंत एमआयडीसी परिसरातील ई-सेक्टरमध्ये फिर्यादी यांच्या मालकीच्या आनंद बॅटरी कंपनीत अज्ञात चोरट्यांनी प्रवेश केला. कंपनीच्या सिमेंट कंपाऊंडला असलेली जाळी तोडून आत प्रवेश करत चोरट्यांनी शिशाच्या धातूच्या प्लेट्स चोरून नेल्या.

या घटनेबाबत फिर्यादीच्या तक्रारीवरून एमआयडीसी पोलीस ठाणे, जळगाव येथे गुन्हा रजि. नं. ७०३/२०२६, भारतीय न्याय संहिता २०२३ मधील कलम ३०५(अ), ३३४(१) अन्वये गुन्हा दाखल करण्यात आला.

गुन्ह्याचे गांभीर्य लक्षात घेऊन पोलीस अधीक्षक श्रीकांत धिवरे यांनी एमआयडीसी पोलिसांना आरोपींचा शोध घेऊन चोरीचा मुद्देमाल हस्तगत करण्याच्या सूचना दिल्या. त्यानुसार प्रभारी पोलीस निरीक्षक बबन आढाव यांच्या मार्गदर्शनाखाली पोलिसांनी घटनास्थळाची बारकाईने पाहणी, तांत्रिक तपास, सीसीटीव्ही फुटेज आणि गोपनीय माहितीच्या आधारे तपासाची चक्रे वेगाने फिरवली.

तपासादरम्यान पोलिसांना आरोपींबाबत महत्त्वाचे धागेदोरे मिळाले. त्यानंतर पोलिसांनी कारवाई करत खालील सहा संशयित आरोपींना ताब्यात घेतले—

आसिफ शहा सिकंदर शहा, रा. फुकटपुरा, तांबापुरा, जळगाव

मोहसीन शहा सिकंदर शहा, रा. फुकटपुरा, तांबापुरा, जळगाव

महेश ऊर्फ बापू संतोष भाई, रा. बिस्मिल्ला पोलीस चौकीजवळ, तांबापुरा, जळगाव

मुकेश राजू परमार, रा. गौतम नगर, तांबापुरा, जळगाव

शेख आबिद शेख मोहम्मद, रा. फुकटपुरा, तांबापुरा, जळगाव

शकील शहा ख्वाजा शहा, रा. बिलाल चौक, तांबापुरा, जळगाव

पोलिसांच्या चौकशीत आरोपींनी गुन्ह्यातील चोरीची कबुली दिल्याचे प्रेस नोटमध्ये नमूद करण्यात आले आहे. आरोपींकडून ₹९७ हजार ५०० रुपये किमतीच्या १६ नग शिशाच्या धातूच्या प्लेट्स, एकूण वजन ३३० किलो, तसेच गुन्हा करताना वापरण्यात आलेली ₹३० हजार रुपये किमतीची हिरो होंडा स्प्लेंडर मोटारसायकल असा एकूण ₹१ लाख २७ हजार ५०० रुपयांचा मुद्देमाल हस्तगत करण्यात आला.

पोलिसांच्या तपासामुळे चोरीचा माल थेट पोलिसांच्या हाती

सीसीटीव्ही फुटेज, तांत्रिक तपास आणि गोपनीय माहितीच्या आधारे आरोपींपर्यंत पोहोचत एमआयडीसी पोलिसांनी चोरीच्या प्रकरणाचा छडा लावला. औद्योगिक परिसरातील चोरीच्या घटनांवर पोलिसांची करडी नजर असून, या कारवाईमुळे चोरट्यांमध्ये चांगलीच खळबळ उडाली आहे.

ही उल्लेखनीय कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी नितीन गणापुरे यांच्या मार्गदर्शनाखाली प्रभारी पोलीस निरीक्षक बबन आढाव यांच्या नेतृत्वाखालील पथकाने केली. पथकातील अधिकारी व कर्मचाऱ्यांनी गुन्हा उघडकीस आणण्यासाठी महत्त्वाची भूमिका बजावली.