🚨 राहुरी फॅक्टरीत चोरांचा सुळसुळाट! घरफोडी, वाहनचोरीसह महिलांना अडवून लुटीचे प्रकार; नागरिकांमध्ये दहशत

अहिल्यानगर जिल्हा प्रतिनिधी, शंकर कवाने.

राहुरी फॅक्टरी परिसरात गेल्या काही दिवसांपासून चोरीच्या घटनांमध्ये वाढ झाल्याने नागरिकांमध्ये भीतीचे वातावरण निर्माण झाले आहे. बाहेरील गावांमधून संशयित व्यक्ती परिसरात दाखल होत असून घरफोडी, चारचाकी व दुचाकी वाहनांची चोरी अशा घटना घडत असल्याची माहिती नागरिकांकडून समोर येत आहे.

विशेषतः कारखाना हद्दीतील रस्त्यांवर मोठी वाहने आडवी लावून ये-जा करणाऱ्या महिला व मुलींना धमकावून चोरी करण्याचे प्रकार सुरू असल्याचा दावा करण्यात आला आहे. या प्रकरणातील काही संशयित पोलिसांच्या ताब्यात असल्याचीही माहिती नागरिकांमध्ये चर्चेत आहे.

या वाढत्या चोरीच्या प्रकाराबाबत राहुरी पोलीस ठाण्याच्या अधिकाऱ्यांना माहिती देण्यात आली असून, पोलिस प्रशासनाने परिसरावर बारकाईने लक्ष ठेवून संशयितांवर कारवाई करण्याचे आश्वासन दिल्याचे सांगण्यात येत आहे.

दरम्यान, नागरिकांनी रात्रीच्या वेळी अनोळखी व्यक्ती संशयास्पदरीत्या फिरताना आढळल्यास स्वतःहून त्यांच्याशी वाद न घालता तातडीने पोलिसांना माहिती द्यावी, असे आवाहन करण्यात आले आहे.

तसेच नागरिकांनी आपल्या दुचाकी व चारचाकी वाहनांची सुरक्षितता सुनिश्चित करावी. घराला कुलूप लावून बाहेरगावी जाताना घरात रोख रक्कम, दागिने अथवा इतर मौल्यवान वस्तू ठेवणे टाळावे, तसेच परिसरातील नागरिकांनी एकमेकांच्या सुरक्षेसाठी सतर्क राहावे, असे आवाहन करण्यात आले आहे.

📞 राहुरी पोलीस ठाणे : ०२४२६-२३२४३३

“सतर्क नागरिक – सुरक्षित परिसर” या भूमिकेतून नागरिकांनी संशयास्पद हालचालींची माहिती तात्काळ पोलिसांना देण्याचे आवाहन करण्यात आले आहे.