जालना जिल्हा प्रतिनिधी, सुनील पवार.
कंडारी–परतूर फाट्यावर रक्ताच्या थारोळ्यात आढळला नामदेव पाईकराव यांचा मृतदेह; अज्ञात मारेकऱ्यांचा शोध सुरू
घनसावंगी : घनसावंगी तालुक्यातील कंडारी–परतूर फाट्यावर हॉटेल व्यवसाय करणारे नामदेव पाईकराव यांचा मृतदेह रक्ताच्या थारोळ्यात आढळून आल्याने परिसरात खळबळ उडाली आहे. त्यांच्या अंगावर, पोटावर आणि पाठीवर धारदार शस्त्राने वार केल्याच्या जखमा आढळून आल्याने हा खून असल्याचा प्राथमिक संशय व्यक्त करण्यात येत आहे.
सकाळच्या सुमारास पाईकराव यांचा मृतदेह आढळून आल्यानंतर घटनेची माहिती परिसरात वेगाने पसरली. या घटनेमुळे नागरिकांमध्ये भीतीचे वातावरण निर्माण झाले आहे.
प्राथमिक माहितीनुसार, अज्ञात व्यक्तींनी धारदार शस्त्राने हल्ला करून पाईकराव यांचा जीव घेतल्याचा संशय आहे. मात्र, या हत्येमागील नेमके कारण अद्याप स्पष्ट झालेले नाही. वैयक्तिक वाद, आर्थिक व्यवहार किंवा अन्य कारण या सर्व शक्यतांच्या दिशेने तपास होण्याची शक्यता आहे.
घटनेची माहिती मिळताच घनसावंगी पोलिसांनी तातडीने घटनास्थळी धाव घेतली. पोलिसांनी मृतदेह ताब्यात घेऊन पुढील वैद्यकीय तपासणी व शवविच्छेदनासाठी घनसावंगी उपजिल्हा रुग्णालयात पाठविला आहे.
दरम्यान, अज्ञात मारेकऱ्यांचा शोध घेण्यासाठी पोलिसांकडून तपास सुरू असून घटनास्थळावरील परिस्थिती आणि उपलब्ध पुराव्यांच्या आधारे हत्येचा छडा लावण्याचे प्रयत्न सुरू आहेत. खुनाचे नेमके कारण आणि आरोपी कोण, हे पोलिस तपासानंतरच स्पष्ट होणार आहे.