🇮🇳 नऊ वर्षीय युगांत सोनवणेची राष्ट्रीय स्केटिंगमध्ये सुवर्ण भरारी!

गोव्यात दोन सुवर्णपदकांची कमाई; आता श्रीलंकेतील आंतरराष्ट्रीय स्पर्धेसाठी निवड

जळगांव प्रतिनिधी, जितेंद्र पाटील.

जळगाव, पणजी (गोवा) येथे पार पडलेल्या **‘आरआरएसएफआय ऑल इंडिया राष्ट्रीय स्केटिंग चॅम्पियनशिप’**मध्ये जळगाव येथील अवघ्या नऊ वर्षीय युगांत राजेश सोनवणे याने आपल्या अफाट खेळाच्या जोरावर दैदिप्यमान यश संपादन केले आहे. राष्ट्रीय स्तरावरील या स्पर्धेत युगांतने ३०० मीटर प्रकारात सुवर्णपदक, तर ४०० मीटर रिले प्रकारातही सुवर्णपदक पटकावत महाराष्ट्रासह जळगाव जिल्ह्याचे नाव देशभर उज्ज्वल केले आहे.

युगांतच्या या उल्लेखनीय कामगिरीमुळे त्याच्या शिरपेचात आणखी एक मानाचा तुरा खोवला गेला असून, राष्ट्रीय स्तरावरील या शानदार कामगिरीनंतर त्याची श्रीलंका येथे होणाऱ्या आंतरराष्ट्रीय स्केटिंग स्पर्धेसाठी निवड झाली आहे. अवघ्या नऊव्या वर्षी आंतरराष्ट्रीय स्तरावर देशाचे प्रतिनिधित्व करण्याची संधी मिळणे ही जळगावकरांसाठी अभिमानाची बाब मानली जात आहे.

युगांतने अत्यंत लहान वयातच स्केटिंग क्षेत्रात उल्लेखनीय कामगिरी करत आतापर्यंत तब्बल १५ पदके आणि ८ ट्रॉफी आपल्या नावावर केल्या आहेत. नांदेड, छत्रपती संभाजीनगर येथे दोन वेळा, जळगाव तसेच गोवा येथे झालेल्या विविध स्पर्धांमध्ये त्याने सातत्यपूर्ण आणि चमकदार कामगिरी बजावली आहे.

युगांतच्या या यशामागे त्याची मेहनत, सातत्य, जिद्द आणि खेळाप्रती असलेली निष्ठा यांचा मोठा वाटा आहे. अवघ्या नऊ वर्षांच्या वयात राष्ट्रीय स्तरावर सुवर्णपदकांची कमाई करून आता आंतरराष्ट्रीय स्पर्धेसाठी निवड झाल्याने युगांतच्या कामगिरीचे सर्व स्तरातून कौतुक होत आहे.

श्रीलंका येथे होणाऱ्या आंतरराष्ट्रीय स्केटिंग स्पर्धेत युगांतने देशासाठी सुवर्णयश संपादन करावे आणि आपल्या जळगावच्या शिरपेचात आणखी एक मानाचा तुरा खोवावा, अशा शुभेच्छांचा वर्षाव त्याच्यावर होत आहे.